عـم مــصـري الغـلـبـان

صوره منقوله من مدونه بحب مصر

كان ياما كان يا سعد ياأكرام وما يحلي الكلام الا بذكر النبي عليه الصلاه والسلام

هحكيلكم حكايه كل حاره مصريه هي حكايه عم مصري الغلبان واولاده محمد وفتحيه.عم مصري راجل غلبان كان عامل في مصنع من زمان ولم دخل علينا قطار الخصخصه الي داس علي كل واحد في مصر شقيان اتخصص المصنع وقالو لعم مصري شكرا ياعمنا انت عماله زايده عندنا.اصبح عم مصري في الشارع فقعد علي احد الارصفه بشويه بسكويت وشيكولاته امام احد المدارس واهي الحياه ماشيه.وفي يوم صحي عم مصري علي عياط ام محمد سألها مالك قالت له فتحيه تعبانه اوي.جري عم مصري وفي حضنه فتحيه اقرب مكان ايه؟القصر الفرنساوي وصل القصر وقالهم بنتي هتروح مني مش عارف مالها . قالوا ادفع واحنا نقولك قالهم مش معايا ادفع واحنا نقولك عندها ايه ؟قالهم والله ماعندي العين بصيره والايد قصيره ردوا عليه وقالوااطلع علي القصر المجاني جري ومعاه فتحيه لاقي طوابير مش عاديه ياااااه كل دي ناس مستنيه .كل ده وفتحيه من الالم مستويه . افتكر عم مصري واحد صاحبه في القصر كلمه فدخل علي طول بدون طوابير والعطله ديه . المهم كشف الدكتور قالوا الصدمه المدويه فتحيه عندها فشل كلوي ولازم تعمل غسيل 3 مرات اسبوعيا .صرخ عم مصري وقال منين ده انا بدوخ بمحمد علشان يأخد جلسه في معهد الاورام ده امه بتقعد بيه علي الباب علشان تأخد دوره لان مفيش اجهزه .ومستشفي 57357 رغم جمع كل الملايين اللي بقالها سنين ولسه مستنيين

مفيش قدامك يا عم مصري غير القرار اللي علي نفقه الدوله جري عم مصري رهوان لاقي الموظف بيقولوا خلاص احنا عملنا السنه دي القرارات الكفايه تعالي اول السنه الجديده وطبعا القرارات كلها انتوا عارفين خلصت علي مين

ركع عم مصري وقعد يبكي علي حاله وبيبص لمحمد وفتحيه وهما بيقربوا من الموت شويه شويه ومش عارف يعمل ايه ؟

وتوته توته ولسه مفرغتش ولا هتفرغ الحدوته