فــي الــصــمــيـــم

لما الضماير تهون شوف اللي ممكن يكون تخدع وممكن تخون وتصاحب الشيطان بس في نهايه المصير الحق صوته يبان

الأحد، سبتمبر ١٧، ٢٠٠٦

ليتها تعود

ايام جميله مرت علينا ولم ندرك طعمها الا بعد ان فقدناها .ايام كان همنا الاوحد فيها ان ننام مبكرا لكي نستيقظ مبكرا ونرتدي الثوب المكوي والكرافته وكارنيه المدرسه الذي يوضع علي الصدر ونرفع علي اذرعنا الشنطه الثقيله الممتلئه بالكتب والكشاكيل وناخذ السندوتشات ونضع الزمزميه داخل الثلاجه للاستمتاع بطعمها الرائع بين الحصص والحصص ونخرج الي الشارع لتجد اسراب وافواج من التلاميذ ذاهبين كلهم صوب هدف واحد وهو المدرسه ونهرول سريعا للدخول اليها والوقوف في الصف الاول لحضور الطابور الصباحي ونحني ننشد النشيد الوطني العتيق( بلادي بلادي ...لكي حبي وفؤادي) ونحن في منتهي السعاده حتي تاتي تحيا العلم فنقف كلنا كالبنيان المرصوص ونقول باعلي صوت لنا( تحيا جمهوريه مصر العربيه) ونصعد الي الفصول ونأخد الحصص بانتباه شديد نركز مع الابله او الاستاذ حتي لاتهرب منا جزئيه ما نتحصر عليها يوم الامتحان .ويضرب جرس الفسحي فنخرج مسرعين تجاه الحوش المدرسي لاستغلال كل ثانيه في الفسحي لكي نلعب كره قدم او استغمايه وبعدها ندخل الفصول وغالبا ما نكون منهمكين من التعب حتي ينتهي اليوم ونرجع الي البيت الذي هو في اهبه الاستعداد وكاننا في معسكر وناخد قسط من الراحه ونستيقظ كي نذاكر ما اخذناه صباحا
ايام رائعه وذكريات جميله ليتها تعود وهي ايام الدراسه رغم اننا في قمه الغضب منها ونحن فيها والان نترحم علي هذه الايام التي اصبحت ذكره جميله في خضم الحياه

27 تعليقات:

  • في الأحد, سبتمبر ١٧, ٢٠٠٦ ٢:٣٧:٠٠ م , Blogger مفلس افندى الرايق يقول...

    بجد ايام كان الواحد رايق فيها وضحك ولعب
    دلوقتى الهم ركبنا وشوفنا الدنيا على حقيقتها

    انا برضه لسه كاتب موضوع جديد

     
  • في الأحد, سبتمبر ١٧, ٢٠٠٦ ٢:٥١:٠٠ م , Blogger لمياء الحالمة يقول...

    مفيش أحلى من ذكرياتنا أيام الدراسة وايام ما كنا صغار ومش دريانيين عن إللي بيجرى حوالينا, وزي ماقولت, اياميها كنا بنكرهها, لكننا دلوقتي لما بنفتكرها بنتمنى إن الزمن يرجع لورا

    مدونتك جميلة, وإنشاءالله حبئى ازورها تاني

     
  • في الأحد, سبتمبر ١٧, ٢٠٠٦ ٤:٠٦:٠٠ م , Blogger دعاء غريب يقول...

    أية الجمال ده
    وصفك رائع انا كنت ناويه برضه اكتب عن ذكرياتي وايام الدراسه
    وخصوصا ان مش ذكريات بعيده قوي
    دي اول سنة ليه بعد التخرج
    لكن انت سبقتني
    وحتي لو فكرت اتكلم انا كمان عن ايام الدراسه مش هتبقي بالروعة اللي انت كتبت بيها
    اهنيك يافندم
    تحياتي

     
  • في الأحد, سبتمبر ١٧, ٢٠٠٦ ٤:٠٨:٠٠ م , Blogger Mamdouh Dorrah يقول...

    هي دي سنة الحياة يا محمد....

     
  • في الأحد, سبتمبر ١٧, ٢٠٠٦ ٦:٤٣:٠٠ م , Blogger sara يقول...

    جميل اوى الموضوع ده
    احساس جميل
    اتلاقيك كنت طالب شاطر علشان كده بتحب المدرسه
    المهم كفايه فضايح كده
    باى

     
  • في الأحد, سبتمبر ١٧, ٢٠٠٦ ٦:٤٩:٠٠ م , Blogger أحمــــــــدبــــــــــلال يقول...

    فكرتنى بالمدرسة بجد أنا وحشانى بالرغم من أنى كنت مابحبش أقوم بدرى
    و ياسلام لما كانت تبقى المدرسة المسائية كنت بفرح أوى

    وحشنى القميص و الكرافات المفتوح
    و الشنطة على الكتف
    و الكلام من ورا الاستاذ علشان أقول تعليق لزميلى على الحصة

    و ياسلام بقى لما كنت أعمل حاجة كويسة و يكافئنى المدرس يااااااااه
    كنت أبقى مبسوط أوى
    و طبعاً فى الاعدادى و الثانوى كنت بعرف أرسم حلو
    فكنت على طول مشترك فى جماعة الرسم و الصحافة المدرسية و ياما أخدت جوايز فى المدرسة بس كانت بتبقى وسيلة أنى أفضل بره الفصل و ساعات بره المدرسة كلها من غير ما أتكتب غياب

    تحياتى

     
  • في الأحد, سبتمبر ١٧, ٢٠٠٦ ٧:١١:٠٠ م , Blogger nirfana يقول...

    ذكريات جميلة جدا .. تتجدد فى ابنائنا

     
  • في الأحد, سبتمبر ١٧, ٢٠٠٦ ٩:١٥:٠٠ م , Blogger ...دنيتي يقول...

    كل سنة وانت طيب يا محمد ورمضان كريم:)
    وشكرا على السؤال:)

     
  • في الأحد, سبتمبر ١٧, ٢٠٠٦ ٩:٣٢:٠٠ م , Blogger Nouran يقول...

    اه اللبس المكوي ده حكاية والله مالها المدرسة ما كنت فيها مبسوطة 24 قيراط انا رحت يوم اتعذبت مواصلااات بس الكلية شكلها كده هتبقى حلوة ان شاء الله كل سنة وانت طيب وعقبال ما عبدالله كده يخش كي جي وان هههههههه

     
  • في الأحد, سبتمبر ١٧, ٢٠٠٦ ١٠:١٢:٠٠ م , Blogger moorgen يقول...

    محمد
    فعلا ايام المدرسة كانت جميله والفرحة بكل حاجة جديدة انت عارف انا كل سنه مواظبه ان اول يوم دراسه اصحى بدرى واتفر ج على الطلبه
    اينعم هما الصبح حاجة واخر اليوم حاجة تانيه خالص بس انا بحب اشوفهم

    ربنا يعينهم

    تحياتى

     
  • في الأحد, سبتمبر ١٧, ٢٠٠٦ ١٠:١٢:٠٠ م , Blogger Dody يقول...

    وصف جميل جدا يا محمد اسلوب جميل اوى وذكريات جميله اينعم كان نفسنا نخلص من المدرسه بس لما سبناها وحشتنا ايامها اوى

     
  • في الأحد, سبتمبر ١٧, ٢٠٠٦ ١١:٤٩:٠٠ م , Blogger الباشمهندزة يقول...

    ايه ده ؟؟كان تايه عني ازاي البلوج الجامد ده؟؟؟ازاي ما دخلتوش قبل كده ؟؟....معلش زيارة متاخرة بس البلوجيين الكبار لازم يسامحو الصغيرين اللي زيي ولا ايه.... المهم جامد اوي البوست ده مشاعره حقيقية اوي كانها مجسمة....ياريت نقدر نمسك الايام بايدينا وما نخليهاش تمر بس نعمل ايه بقي لازم تمر علينا زي مامرت ع اللي قبلينا:(:(:(....انا دلوقتي بعد مافهمت ان الواحد ما بيحسش بالحاجة الا لما بيفقدها بقيت احب الايام اللي عايشاها عشان الثانية اللي بتعدي مش حييجي زيها ابدااااااا....سلام وابقي عدي كده علينا شوية:):)

     
  • في الاثنين, سبتمبر ١٨, ٢٠٠٦ ١:٠٩:٠٠ ص , Blogger shaden يقول...

    كانت أيام رائعة
    وراح تفضل احلى الايام
    ليتها تعوود للوراء ولو قليلا لنعيش في دنيا مافيها لا حقد ولا كره ولا كذب ولا مصالح
    يكوون الصديق بمعنى الكلمة صديق مش متل هلأ يكوون صديقك وقت المصلحة وبس
    آآآآه يالدنيا

     
  • في الاثنين, سبتمبر ١٨, ٢٠٠٦ ٢:٢٤:٠٠ ص , Blogger Yousra يقول...

    عندك حق أجمل و أحلي أيام ، حفلات المدرسة و أعياد الميلاد و اللعب في الفسحة و المقالب في المدرسين و الأصحاب البجد مش المصلحجية..... ياه يا ريت ترجع

     
  • في الاثنين, سبتمبر ١٨, ٢٠٠٦ ٩:١٠:٠٠ ص , Blogger أُكتب بالرصاص يقول...

    ليه بس فكرتنا بالايام الحولة دي

    يا سلااام
    ايام جميلة
    الله لا يعيدها
    وعلى رأي المثل
    تنذكر ولا تنعاد
    :)

     
  • في الاثنين, سبتمبر ١٨, ٢٠٠٦ ١٢:٥٩:٠٠ م , Blogger محمد أبو الفتوح يقول...

    ياااااااااااه
    أثرت شجونى يا محمد
    تعرف إن كل سلسلة رجل المستحيل و ملف المستقبل خلصتهم فى الفصل
    كنا أنا و محمد سعد نحط القصص وسط الكتب و لما نخلص نبدلها
    يا سلاااااااام على هوا الشتا فى الصبح، الهوا ده اللى مليان ريحة المطر و المرايل و لا صوت مارش الطبله و إحنا طالعين ع الفصول

     
  • في الاثنين, سبتمبر ١٨, ٢٠٠٦ ٢:٤٧:٠٠ م , Blogger radwa osama يقول...

    ياااه فكرتني بالمدرسة ..ولبس المدرسة وجزمة المدرسة والكشاكيل الجديدة والاستيكة والمسطرة و........وكل التفاصيل اللي واحشاني قوي ..بوست جميل يا محمد

     
  • في الثلاثاء, سبتمبر ١٩, ٢٠٠٦ ١:٢٧:٠٠ ص , Blogger BaTresYa يقول...

    مع ان موضوع المدرسة دي انا مش حسيت بيها الا فترة الابتدائي وال2و3 ثانوي بس بس بجد كانت ايام حلوة

     
  • في الثلاثاء, سبتمبر ١٩, ٢٠٠٦ ٢:٥٦:٠٠ ص , Blogger moony يقول...

    الواحد مش بيحس بطعم وحلاوه الايام غير لما الايام ديه تكون ماضى محدش بيحس ان فى حاضر كويس ابدا .بس عندك حق ايام المدارس احلى ايام علشان الواحد كانت مسؤلياته محدوده انه يذاكر ويلعب بس.

     
  • في الثلاثاء, سبتمبر ١٩, ٢٠٠٦ ٣:٥١:٠٠ م , Blogger مفلس افندى الرايق يقول...

    انضم للدفاع عن رسولك

     
  • في الثلاثاء, سبتمبر ١٩, ٢٠٠٦ ٤:٥١:٠٠ م , Anonymous نورهان مفيد يقول...

    ده ايه السرد الجامد ده بقي انت كنت بتعمل كل ده اصل انا كنت صغيرة ومش فاكرة بس يارب اشوف عبدالله واخد عهد
    في ايده ورايحين المدرسة بنفس الشكل اللي انت كاتبه ده واهم حاجة عبدالله ميطلعش لابوه من ناحية الدراسة عايزين الواد يفلح والنبي ويدخل هن دسة عشان ابوه فرقت معاه علي 20%
    ويارب كل ذكرياتك الحلوة تعيشها مع عبدالله واخواته ان شاء الله

     
  • في الثلاثاء, سبتمبر ١٩, ٢٠٠٦ ٦:٠٩:٠٠ م , Blogger أجدع واحد في الشارع يقول...

    مع احترامى ليك
    بجد هى دى ايام رائعه وذكريات جميله ليتها تعود وهي ايام الدراسه رغم اننا في قمه الغضب منها ونحن فيها والان نترحم علي هذه الايام التي اصبحت ذكره جميله في خضم الحياه
    اللى عجبتنى اووووووووى عشان هو ده الصح

     
  • في الثلاثاء, سبتمبر ١٩, ٢٠٠٦ ٦:٥٥:٠٠ م , Blogger بعدك على بالى يقول...

    انا منكرش انها كانت ايام حلوة لان بالنا كان خالى من الهموم، كل مشكلتنا اننا مش فاهمين ده او مش عارفين نذاكر دى مقارنه بهموم الواقع الان، وعموما ماتستعجلش بكرة البوكيمون يكبر وتعيش معه التفاصيل دى تانى لغايه ماتزهق، وتقعد تذاكر له كانك انت اللى حتمتحن

    تحياتى

     
  • في الثلاثاء, سبتمبر ١٩, ٢٠٠٦ ١١:٠٣:٠٠ م , Anonymous حسنة من الله يقول...

    ياه ايام بجد حلوه وانا لسه كنت بتزكرها ...كانت ايام لنا هدف محدد وواجبات كنا بنعملها لكن دلوقتى واجبتنا مش قدرين بل عاجزين عن انجازها حتى الصداقة كنت احلى واصدق والى الان اصقائى هم اصدقاء المدرسة اما الكليه الله يرحم

     
  • في الأربعاء, سبتمبر ٢٠, ٢٠٠٦ ٥:١٥:٠٠ ص , Blogger gwad يقول...

    محمد افندى
    انا كل سنة بقف فى البلكونة عشان اشوف العيال وهى فرحانة بدخول المدارس وكنت بضحك عليهم لانهم متفائلين وتانى يوم يقوموا من النوم بالضرب انا جارهم اصحى على صوت امهم وهما لسة نايمن
    تحياتى ايام لا يرجعها

     
  • في الأربعاء, سبتمبر ٢٠, ٢٠٠٦ ١:٠٦:٠٠ م , Blogger المزاجنجي يقول...

    يااااااه يا سي محمد قلبك اسود لسه فاكر ... والله كانت حلوة واحنا كنا زهقانين منها لكن دلوقتي بنترحم عليها على رأي المثل يا ولاد
    ما يعرفش قيمة امه الا اللي يشوف مرات ابوه ....وسلامتك

     
  • في الأربعاء, سبتمبر ٢٠, ٢٠٠٦ ١١:٣٠:٠٠ م , Blogger saso يقول...

    انا بقي بعيشها لسة لما اوصل جارتي الصغيرة الغلسة زي مابتقول علي نفسها لمدرستها اللي هيا مدرستي القديمة كل يوم
    نفس الخناقات،، نفس الصحاب ولو انها عاقلة وبتشيل شنط وكتب وانا عمري ماعملت الحاجات دي

    انا وحشني بس رجوعي العصر ناسية كل حاجة عن المدرسة .. لية ماكناش بناخد قلقنا وزعلنا معانا البيت زي الايام دي

     

إرسال تعليق

الاشتراك في تعليقات الرسالة [Atom]

روابط هذه الرسالة:

إنشاء رابط

<< الصفحة الرئيسية