يمين طلاق بـ 40 جنيه

زميلي بالمكتب أعتبره من أهم المساهمين في شركات السجائر لمساهمته المستمره في شراء أكثر من علبتين يومياً

وفي يوم تحدثنا طويلاً عن فكره التدخين بعيداً عن الحلال والحرام لان الموضوع ده بيتعبه نفسياً وشايف ان التدخين مكروه ومش حرام . المهم

وبعد نقاش طويل كعاده كل يوم قال لي / عليا الطلاق مانا شارب سجاير تاني

قلت له / ايه لازمه الطلاق بقي . ممكن تقرر انك تبطل من غير ما تحلف الموضوع مش حلفان الموضوع عايز اصرار ليس أكثر

قال لي / لاء علشان لما افكر اني اشرب افتكر اليمين( طبعاً منطق غريب جدا) واستمر علي يمينه لمده 48 ساعه

وبعدها وجدته يدخن كعادته فسألته / ايه يا عم الحاج شربت سجاير تاني ليه ؟

قال لي / انا مش قادر ياعم ابطلها وبعدين سألت وقالولي ادفع 40 جنيه كفاره يمين وخلاص

قلت له / وانت عملت ايه ؟ 

قال / دفعت الـ 40 جنيه والحمد لله

قلت له / والحياه في البيت ماشيه زي الفل  ؟

قال/ الحمد لله وربنا يسامحني ياعم. متعقدنيش

قلت له / مين اللي قالك أدفع 40 جنيه

قال لي / شيخ بالمسجد اللي جنبنا ده ( بجوار المكتب ) ودفعتهم له

قلت له / اللي اعرفه ان دي تعتبر طلقه وبعدين أسأل حد ثقه

قال لي / ان شاء الله

وبعد يومين واحنا ماشيين قالي/ شايف الراجل اللي قاعد علي باب المسجد ده هو ده اللي سألته

بصيت بسرعه لقيت الراجل قاعد نص قعده علي باب المسجد وبيشرب سجاره

ولما سألت عنه قالولي أنه / خادم المسجد   

حقاً ساحره مستديره

جاء اليوم علينا والتي اختزلت فيه كل أمال واحلام الشعب المطحون في نتيجه ماتش

من 10 ايام وبعد هزيمه المنتخب من الجزائر وقامت الدنيا ولم تقعد وكأن الحياه تحولت لسرادق عزاء كبير وتحدثنا جميعاً عن كأس القارات الذي سيكون بمثابه باب زويله لكل المنتخب ولكن تأتي الرياح بما لا تشتهي سفن جميع متابعي الكره بغض النظر عن نتيجه مباراه أمريكا

فعند الفوز تجد جميع طوائف الشعب في منتهي السعاده والاغاني الوطنيه من نوع   ( أصله معداش علي مصر-مشربتش من نيلها ) والدموع والاهات والليالي الملاح وعند الهزيمه ننام من المغرب ونسب ونلعن وكأننا في عزاء

جاء اليوم اللي تبدلت فيه كل شئ . أصبحت أحلامنا جميعاً في اختزال ولم ولن نجد الفرحه الا في كره القدم . في الوقت الذي فشلت فيه جميع الانظمه والحكومات والمسئولون والناس انفسهم في رسم البهجه وأدخال السرور علي قلوب المتابعين فحقاً هي ساحره لما تملكه من سطوه علي قلوب متابعيها ومستديره لانها في لمح البصر قد تبدد الفرح الي حزن كما حدث مؤخراً ومن حزن الي فرح كما حدث من اسبوع

اهم شئ في الحلم أننا نحلم حلم نقدر نحققه

مش نحلم ونتخيل أننا ملكنا الدنيا وفي الاخر

نصحي علي واقعنا المرير 

علي الاقل علشان نضمن أننا هنبتسم ولو للحظات متتابعه

نهايه فصل من المأساه المعتاده

أصبحت في الفتره الاخيره أترقب التغيرات التي أستجدت علي المجتمع والتي تكاد تفقدك الاحساس بالدهشه من فرط التحول الرهيب فيه

فقضيه المهندس شريف قاتل أسرته أخذت مني وقتاً طويلاً في متابعتها ودراستها 

فقد يتعجب البعض من أني اشفق علي هذا الرجل الذي راح ضحيه لحظه طيش فقد فيها كل ما يملك وقام بقتل أسرته بالكامل خشياً الفقر 

لا أنكر أنه مع قله الايمان نجد أكثر من ذلك ولكن هل هي لحظه فارقه قد تحًَول الانسان من شخص عادي الي انسان متجرد من كل الاحاسيس ويرتكب مثل هذه المجزره؟

فنهايه هذه القضيه كان الاعدام وهو كان ما يتمناه ويطلبه هذا الرجل في كل حوارته والتي وضع له القدر السطر الاخير أمس برحيله في محبسه أثر أزمه قلبيه

فأنا لست ضد هذه العقوبه ومعها جملاً وتفصيلاً ولكن شغلي الشاغل منذ بدايه القضيه هو التحول المفاجئ لهذا الشخص

أخشي أن نشاهد المهندس شريف كثيراً وكثيراً في مجتمعنا اليوم في ظل كم المتناقضات التي نحياها 

فتختلف طريقه التعبير ودافع التصرف 

وتبقي النتيجه واحده

هي بقت كده ؟

ده إعلان نازل صفحه أولي في جريده الشروق عدد يوم الاحد

مساحته نصف الصفحه الاولي

وده خبر في الصفحه السابعه ( أيوه السابعه ) من نفس الجريده

وفي نفس العدد

علي رأي منذر هي بقت كده ؟

مش فاهم ولا لاقي اي مبرر لكل الضجه اللي معموله للهيفا دي بجد يعني . والهبل والهوس اللي الناس فيه ده

بتاع اللبن قاعد متنح قدام العاشره مساءاً وكأنه في حلقه تمرين اليوجا و الواد خطف رغيف فينو وجري ولا هو هنا واقوله يا عم الحاج الواد خطف رغيف الفينو وجري. يقولي وهو بيبتفرج علي الهيفا وهبي ولا هاين عليه يبص لي :  ايوه بـ 15 قرش الرغيف يا استاذ وهو عايش في الغيبوبه

ولما يتوفي رجل بحجم محمد نصير ينزل خبر زي ده وعلي استحياء  وكأن شئ لم يكن أيه يعني ما كلنا هنموت

الادهي بقي لما الاقي زميلي في المكتب بيقولي ده انا طول الليل صاحي. قلت له ليه من الحر . قالي لا ياعم من هيفا ده احنا طلعنا ظالمينها. فرحها مش بـ 50 مليون ولا حاجه ده أحنا شعب بتاع اشاعات. قلت له مين قالك . قالي هي أمبارح في البرنامج أنت مشفتوش

قلت له لاء قالي يا رااااجل ده انا عرفت من الجرنان لما كان معاك وروحت نمت شويه وقلت السهره النهارده ماتش وهيفاء

قلت له محمد نصير مات ؟ قالي عميل عندنا في المكتب ده ؟

قلت له جوزيه هيسيب الاهلي . قالي طبعاً 160 الف دولارفي الشهر أحسن من 80 الف دولار بتوع الاهلي

والله قلت وقتها خلي اللي بيخطف الفينو يخطف

واللي بيسهر لهيفا يسهر

واللي يأخد 160 الف دولار يأخد

واللي يموت يموت

وأحنا نستحق أكتر من اللي أحنا فيه وأكتر

أهو بنقضيها

هول الصدمه

منذ يومين وانا في الميكروباص بجوار السائف ومنهمك في قراءه أحد الكتب سمعت صوت أصطدام عنيف بالسياره وفرمله رهيبه فنظرت فوجدت عجله ملقاه علي الارض وشاب طائر وسقط علي وجهه والدماء تنزف

بنظره سريعه علي السائق فأذا به يبتسم ابتسامه ساذجه وأذ بالشاب المصاب ينهض سريعاً ويقول بكل حده للسائق / ايه يا شريف يلعن ابو التهريج اللي بالشكل ده . متهرجش معايا تاني

فرد عليه شريف/ هو انا لسه هرجت ده انا مش عايز اقرص عليك دي حاجه صغيره يا ابن ........... مع ضربه قلم - سمعها أخر من في الميكروباص-أقابلك بالليل علي القهوه وتكون جبت المصلحه

ومشي الشاب واستمر السائق في القياده وكأن شئ لم يكن

فأدركت وقتها لماذا نزداد تبلداً يوماً بعد يوم

ولا تنسوا الفضل بينكم

من أعظم الأشياء انك تدين بالفضل لمن هم كانوا سبباً في تقديم لك أي شئ أو منحوك فرصه ذهبيه لتحقيق أحد أحلامك

ولكنه من الشرف لي أن أعترف بفضل هذه الزوجه الحبيبه علي كل افراد أسرتنا الصغيره فتتحمل عبء لم ولن أقدر علي تحمله مطلقاً . فالعبدين وحدهم يحتاجون الي انسان ألي يجوب البيت ليل نهار ليلبي لهم طلباتهم التي لا تنتهي

 والاغرب انك تجد ابتسامه مميزه منها عند هذه المعاناه منها بكلمه تذيب كل هذا العناء/ هما دول رسالتي

أما بخصوص المشكله الكبيره بالبيت وهو العبد لله فأعتراف انها قد منحتني كل سب العيش ووفرت لي كل وسائل النجاح وكانت سبباً رئيسياً بعد الله عز وجل فيما انا فيه الأن . فحقاً تستحقي مني أسمي ايات التقدير والامتنان والأعتراف بهذا الجميل

زوجتي الحبيبه

كل عام وأنتي فوق رأسي

هيييييييييييه ... بقولك أنت

بشخطه فظيعه تكاد ان تصيبك بالسكته القلبيه يصرخ ممدوح فرج في إعلانه العجيب

لجميع المشاهدين ( الرشاقه مسئوليه كبيره هييييييييييه .. بقولك انت ) ولو أن الاطفال شاهدوا هذا الاعلان فمن الممكن الاصابه بفزع ليلي يمنعهم من النوم قرابه الاسبوع

 الترويج لفكره التخسيس فكره عتيقه جداً واثبتت فشلها ولا اقتنع بكل المسلسلات الفاشله التي ينادوا بها ليل نهار ولكن الاغرب من ذلك ان تأتي الدعوه من شخص يزيد عن الـ130 كيلو ( وكده كمان بكرمه) ويكلمك عن الرشاقه والمرونه و لو كنت قدامه دلوقتي كان هيأخدك نص حراميه عقاباً لك علي السمنه لا والادهي انه بقي نجم سينمائي  

فلو سنحت لي الفرصه بمقابله ممدوح فرج وبعد الحصول علي الاتوجراف منه هسأله 

أنت مش ناول تعتزل بقي ....هيييييييييه بقولك أنت