بيتعمل فينا كده ليه؟

فوجئت بالتليفون بيرن فرديت وجدت احد اصدقائي منذ الدراسه ورفيق الكفاح وقالي عندي ليك خبر وحش . قالي ان اتنين من اصدقائنا سافروا الي ليبياالنهارده الصبح للبحث عن شغل هناك وبعدين يسافروا علي ايطاليا .وهما اتفقوا مع بعض من غير ما حد يعرف عشان محدش يعجزهم.

فاغلقت التليفون وجلست افكر هل هم خطأ ام علي صواب ؟ فوالله والله العظيم انا اعرفهم قرابه ال8 سنوات وكنا مع بعض في الجامعه وبعد التخرج جلسنا نبحث عن عمل فانا وجدت شغل كده لحد ما تفرج .انما هما اشتغلوا كل حاجه ومفيش عندنا ان في شغل عيب وامنيتي ان اجد لهم في المكتب عندي عمل لكن دون جدوي ولا انسي احدهم الذي كان خاطب حبيبه عمره ولكن في ظل الظروف اللي فيها اضطر لفسخ الخطوبه ولم يجدوا اي امل لهم الا السفر للخارج.

هل هذا نتيجه المذاكره والاجتهاد وبعد ان صرف اهالينا علينا دم قلبهم يجدونا بدون عمل او نسافر الي الخارج ونتمرمط ويطلع عين ابونا عشان نلاقي نعيش احنا مش طالبين اي حاجه صعبه احنا عايزين شغل .

فنحن عندنا 25 سنه يعني عز الشباب وان لم تفعل شي في هذا السن لم تفعل ونريد ان نفعل كل شي ونجتهد ونعيش عيشه مستوره بجانب اهلينا لكي يجدونا حينما يحتاجونا.

ذنبا اننا كنا طلبه مجدين في الدراسه وكلنا اتخرجنا بتقديرات كبيره طالما الخريجين مش هيشتغلوا يبقي ليه نوجع نفسنا ونتعب اهالينا معانا الواحد هيجنن من كتر التفكير.

ليه كل العلماء المصريين من زويل الي مستجيرالي .......... حققوا ما وصلوا اليه خارج مصر ولم يحققوا في مصر هل العيب فيهم ام في مصر تجد لا مبالاه في كل شي واهي ماشيه وربك هيفرجها يعني انت اللي هتغير الكون . كل ده كلام هتسمعوا الواحد بقي علي اخره والعمليه مش ناقصه

والله انا مش عارف انا كنت ناوي مكتبيش وانا زهقان لكن وجدت ان الموضوع لايحتمل التاخير فيا تري هشوف صحابي دول تاني والا يكون القدر اقوي مننا لانهم لم يتركوا اي شي يدل عنهم في الخارج.

وارجو الا يتم الخلط بينهم وبين ال11 عيل بتوع جامعه المنصوره الذين هرولوا وراء السراب من اجل امريكا اللعينه

فالان اصبحت مصر بالفعل أســـــيا اوي علي اهلها

مع الاعتذار لفيلم عماره يعقوبيان