فــي الــصــمــيـــم

لما الضماير تهون شوف اللي ممكن يكون تخدع وممكن تخون وتصاحب الشيطان بس في نهايه المصير الحق صوته يبان

الأربعاء، مارس ١٨، ٢٠٠٩

أه يانااااااااااااااا... تعبااااااااااااااااااااانه

بعد أن تأكدت أن الازمه المرورويه في مصر زيها زي اي ازمه بنمر بيها في مصر ( عشره عمر يعني ) منقدرش نستغني عنها لدرجه انك لو وصلت بدري شغلك 5 دقايق ممكن يوصل بيك الحال ان دموعك تخونك من فرط الفرحه
المهم بدأت اتغلب علي ده بأني اقرأ كتب وانا في المواصلات وغالباً بتخلص وانا لسه موصلتش . المهم أمبارح بقي كان يوم حافل لاني وبعد ما ركبت وبدأت اقرأ لاقيت السواق شغل الكاسيت بصوت عالي جداً والادهي ان الموسيقي كلها خبط ورزع ولا مفهوم ولا كلمه او ممكن تكون كان في كلام بس مش مسموع لدرجه خلتني مش عارف اركز
فقلت للسواق / وطي الصوت شويه علي قدك لو سمحت فؤجئت بنظر معظم الركاب لي وكأني أخطأت او شتمت السواق ولسان حالهم بيقول ( مين الغريب اللي عايز السيمفونيه الرائعه دي تتقفل ) ولاننا في بلد ديمقراطي وتطبق فيه الشفافيه فلم يهتم السواق ولا حياه لمن تنادي نظراً لاستجمام الزباين
المهم استسلمت للامر الواقع وقفلت الكتاب وقلت اهو ساعه استحملها بالطول والعرض والاغنيه الجهنميه شغاله ( أه ياناااااااااااا .. تعبانه  ...........أه يانااااااااااا ... تعبااااااااااااانه ...............) ومش عارف في كلام تاني والا لاء 
الاغنيه مدتها حوالي تلت ساعه وكلها كده وخبط ورزع والناس في قمه الاستمتاع وكأنهم بيستمعوا لأم كلثوم في حفلاتها
ايوه مبسنعش اغاني ومش مهتم خالص بالقصه دي . بس فعلاً وصل الحال لكده مفيش اي حاجه خالص والناس ايه ؟ مستمتعه استمتاع فظيع
لما وصلت الشغل بدردش مع زميلي وبقوله اللي حصل قالي / انت مجنون مش عارف الاغنيه دي دي مكسره الدنيا
فأكتشفت فعلاً تقصيري وعدم متابعتي للدنيا المكسره وجهلي بالانواع الجديده من الفن الاصيل
وأه يانااااااااااااااااا يا دمااااااااااغي
 

التسميات:

20 تعليقات:

  • في الأربعاء, مارس ١٨, ٢٠٠٩ ٩:٣٤:٠٠ ص , Blogger Empress appy يقول...

    تصدق يا ابو العبدين هزعل منك
    دا كانت الداخليه عاملاهاعندى اهداء للشعب
    لانها تعبت منه ازاى عاوز تطفيها
    الادهى بقى واللى موتنى من الغيظ مين اشرف يا وهيه اللى فى الاغنيه التانيه سمعتها مين مرة وسالت عليه طوب الارض
    محدش عارف مين هو ده اقولك ابقى حط قطن فى ودناتك وريح بالك

     
  • في الأربعاء, مارس ١٨, ٢٠٠٩ ١٠:٣٣:٠٠ ص , Blogger Unknown يقول...

    ههههههههههه
    الغلطة غلطتك
    كان المفروض تمشى مع الموجة
    و تعيش بقى
    بس هو فى اغنية احلى
    اسمها الدنيا خربانة
    و انتى دنيا نحن دنيا
    للمطرب الشعبى الأول محمود الليثى

    بس انت فى نعمة يا شيخ
    امال بقى لو ركبت فى سفرية الميكروباص التويوتا
    ساعتين و نص يا مؤمن
    مشغل اغانى محششين
    حرام بجد
    تقوله شغلنا فيلم
    يقولك الدى فى دى بايز
    يشتغل الدى فى دى
    تلاقيه موطى الصوت عشان يعرف يسوق

    بس اوحش حاجة الصراحة
    لما بيبقى مشغل قرآن و معلى الصوت على الأخر
    يعنى المفروض يراعى الناس برده
    اه ده قرآن بس ربنا مقالش نعمل كدة

    يعنى انت لو كنت قولتله وطى الصوت
    لو هو مشغل قرآن كان اقاموه عليك الحد
    و انسى بقى اللحية لن تنفعك ساعتها
    مش بعيد يفكروك مربيها زى جيفارا
    المارق الزنديق
    ههههههههههههههههههههههههه

     
  • في الأربعاء, مارس ١٨, ٢٠٠٩ ١١:٣٤:٠٠ ص , Blogger NilE_QueeN يقول...

    دول عالم دماغها تعبانه

    احسنلك متركزش ف الاغانى دى

    خاف على صحتك

     
  • في الأربعاء, مارس ١٨, ٢٠٠٩ ١١:٤٧:٠٠ ص , Blogger Monzer يقول...

    كويس انه ماقلكش الى مش عاجبه ينزل
    الاغنية دى ممكن يبيع فيه عياله مش اكل عيشه

    روق كده يا شهبندر .. دي الدنيا خرباااااااااانة

     
  • في الأربعاء, مارس ١٨, ٢٠٠٩ ٦:٥٣:٠٠ م , Anonymous غير معرف يقول...

    ههههههههههههههههههههههههههههههههههههه

    عارف بضحك على إيه اصل تخيلت شكلك وأنت بتقول كلمات الأغنية دى زى ما كتبتها ههههههههههههههههههههههههه

    بجد يا محمد حاجة بقت مستفزة جداااااااااااااااا

    وبعدين اغنية اه يانا تعبانة دى فعلا من زمان وزى ما فيه ناس معتبراها اغنية هما معتبرينها مكسرة الدنيا

    هو الظاهر كان فيه واحدة تعبانة وماكانش فيه دكاترة فى المنطقة بتاعتهم ومن كتر التعب فضلت تغنى علشان تنسى هههههههههههههههههههههههههه

    غباء مجتمع صدقنى ومش هيتغير مش هيتغير ابداااااااااااااااااااااااااا

     
  • في الأربعاء, مارس ١٨, ٢٠٠٩ ٧:٥١:٠٠ م , Anonymous غير معرف يقول...

    شوف رغم اننا برضه مليش فى الاغانى وافتخر بذلك وارى ان التفسير الوحيد للى بيحصل حاليا فى كل المجالات كما قال الشيخ الحوينى انخفاض الذوق العام حتى الراقصات بيقولوا مستوى الرقص رجع ورا وكذلك المطربين والعيب صراحة مش منهم العيب من العالم اللى اى هبل تهبل معاه انا اتذكر كذا مره كنت راكبه تاكسى من المرات وشغل اغنية وياسلا الاغنية كلمتين ياوزه يابطه اظاهر مسمعش عن انفلونزا الطيور

     
  • في الأربعاء, مارس ١٨, ٢٠٠٩ ٨:١٨:٠٠ م , Blogger No Fear يقول...

    السلام عليكم
    و الله أنت بتهرج صحيح متعرفش الأغنية دي
    غريب أنت صحيح يا مفيد
    .
    تعرف بقة أنا أمبارح كنت في البستان شوية كده المهم و أنا راجع ركبت ميكروباص حصل اللي أنت حكيته بس مش أنا اللي قلتله وطي طبعا لاقيت تلاتة مع السواق بصوا للرجل المحترم اللي قالهم كده في مراية زي التسريحة كده و كانوا هيقوموا يضربوه
    بس الحمد لله هديوا

     
  • في الأربعاء, مارس ١٨, ٢٠٠٩ ١١:٥٥:٠٠ م , Blogger mohra يقول...

    انا كمان ماعرفهاش
    فاكره اغرب اغنيه سمعتها فى ميكروباص كانت "لا خال و لا عم بيشيل الهم ..مافيش زى حنان الام ...يا امه يا مه يا امه"
    ايه كانت ايام
    على فكره انا كمان باسلى نفسى بالقرايه بس فى النبطشيات

     
  • في الخميس, مارس ١٩, ٢٠٠٩ ١:١٣:٠٠ ص , Blogger mohamed ghalia يقول...

    لا ده فى من ده كتير
    الواحد لازم يمشى يسد ودانه
    يلا ربنا يحفظنا ويهدى
    دمت بكل الود

     
  • في الخميس, مارس ١٩, ٢٠٠٩ ٣:١٩:٠٠ م , Anonymous غير معرف يقول...

    يشرفنى ان ادعوك لحضور حفل توقيع أول كتاب لى فى عالم الادب " لست الا بعض الاوراق" والذى يقام باذن الله يوم الاحد 5 ابريل 2009

    المكان : مكتبة ديوان بمصر الجديدة
    العنوان : 105 شارع ابو بكر الصديق مصر الجديدة – مقابل نادى ضباط الجلاء بمصر الجديدة
    التاريخ : الاحد 5 ابريل 2009
    الميعاد : 7 مساءا

    فى انتظار تشريفك

     
  • في الخميس, مارس ١٩, ٢٠٠٩ ٨:٠٢:٠٠ م , Blogger  هوندا يقول...

    ههههههه بكرة الولية دى ههههههههه

     
  • في الجمعة, مارس ٢٠, ٢٠٠٩ ٤:٥٠:٠٠ م , Blogger يا مراكبي يقول...

    ربنا يكرمك الحق دور لينا على الأغنية دي بسرعة وابعتها ليا على الإيميل عشان نكون مواكبين للحضارة الجامدة دي وما حدش يقول علينا متخلفين ومش دريانين بالدنيا

     
  • في الجمعة, مارس ٢٠, ٢٠٠٩ ١٠:٢٩:٠٠ م , Blogger syzef يقول...

    ياعم الله يكرم اصلك فكرتني بالايام اياها..انا كنت عشان اروح الشغل ف مصر كنت بركب تلات مواصلات ..اول مواصلة اللي هي من بلدنا عشان ابقي جوه القاهرة ودي كان ليها ذوقها بقي زي اللي انت بتتكلم فيه..والتانية والتالته كان كل واحدة منهم ليها ذوقها برضه اللي هو نوع من الاجبار علي التأقلم معاه

    عمري ما حنسي أبدا أول مرة سمعت فيها الأغنية العظيمة اللي بتقول (حط دراعك جمب دراعي..دراعك مش أد دراعي) تب ايه الغباء ده بقي ..تب ما ده شئ طبيعي جدا

    والا الكارثة بقي لما قعدت شهور ناس تكلمني عن عظمة اغنية اسمها المحكمة واللي بيغنيها كان اسمه سيد..تب بذمتك يبقي دي أغنية تتسمع أو ده مغني يتسمع؟ وجيت سمعت المحكمة ف أحد المواصلات برضه عشان أكمل مسيرة كره نفسي

    واديني الحمد لله سبتلهم البلد كلها
    تحيا مصر يامحمد

     
  • في السبت, مارس ٢١, ٢٠٠٩ ١٢:٣٠:٠٠ ص , Blogger احساس لسه حى يقول...

    عزيزى

    انا معرفش الاغنية دى بصراحه

    بس اعرف الخنقة المرورية كويس

    ومعلش بقه لازم نقبل اى شئ سواق يشغله علشان كفاية عليه قانون المرور

    نبقى احنا وهما

    انا جبت سيرتك فى مدونتى

    انا مش موافق

    وحبيت اقولك علشان مكنش اغتبتك

    تحياتى

    سلام

     
  • في السبت, مارس ٢١, ٢٠٠٩ ٤:٥٠:٠٠ م , Blogger دكتور حر يقول...

    لولا ان احنا منهم يا عم المفيد

    كنت قلت يستهال المصريين التوهان اللي هم عايشين فيه

    سياسة كل الدول العربية

    شبع بلدك يسكتوا

    زاحنا

    جوع بلدك يسكتوا

    :)

    وآه ياااااااااااااااااااني يا تعبان

     
  • في الأحد, مارس ٢٢, ٢٠٠٩ ٧:٣٣:٠٠ م , Blogger كلبوزة لكن سمباتيك يقول...

    الست بتشتكي من همها و الناس متفاعلة معاها
    ده بدل ما تدعيلها ربنا يزيح عنها و يشفيها من اللي تاعبها
    هههههههه
    الغناء في مصر اصبح غباء
    و الله يرحم ام كلثوم

    خالص مودتي و تحياتي

     
  • في الأربعاء, مارس ٢٥, ٢٠٠٩ ٧:٤٤:٠٠ ص , Blogger الحقيقة المصرية يقول...

    بشرى ساره لجميع مدونين مصر وخبر هام وعاجل
    انتصرناااااااااااااااا
    وتحيا مصر وعاشت بورسعيد..وبيان عاجل
    تابع الحقيقه المصريه
    او من خلال هذا اللنك للاهميه وسمعيني زغروطه على المدونه

    http://elhakika.blogspot.com/2009/03/blog-post_25.html

     
  • في الجمعة, مارس ٢٧, ٢٠٠٩ ٣:٠١:٠٠ ص , Blogger أسما عواد يقول...

    انا كده بقى اصبح عندي عزاءإن
    موش انا لوحدي اللي بعاني
    انا كان ليا الشهر اللي فات نوع تاني من المعاناة
    كنت مسافرة على طريق مصر اسكندرية الزراعي
    وسواق البيجو شغل القرآن بصوت عالى جدا فطلبت منه يخفض الصوت واكدت عليه انه ميطفيهوش
    واللي حصل ان كان فيه واحدقاعد ورايا
    قبل ما المقريء يقرأ اي آيه يقرأها هو بصوت عالي
    ولما المقريء يخلص الآية يعيد عليها هو تاني ويقول بصوت عالي يا حبيبي يارب
    يا سميع
    يا قادر
    الله ... الله الله الله
    وانا ليا مين غيرك يا رب
    وهكذا لغاية ما اعصابي تعبت
    أنا كنت اول مرة اشوف حد يشتغل معلق على القرآن
    بدل من معلق على الكورة
    بعد ما تعبت وأعصابي تعبت قلتلو لو سمحت انا موش عارفة اسمع
    وكانت الطامة
    لقد اعتبني كافرة
    قال لي منك لله انا كنت عايش مع ربنا بناجي ربنا وانت قطعتي عليا عبادتي
    قلتله طيب وهو كل واحد بيعيش مع ربنا لأزم ينقل مراحل حياته دي حيا على الهواء؟
    قالي وانت مالك انتي عارفة انا فيا ايه
    وبعدين فجاة رفع ايده للسما ودعا عليا وقال يا رب .. يا رب انت عارف ان ممنعنيش عن ذكرك ومناجاتك
    الا الشديد القوي يا رب .. منك لله
    ها ايه رأيك
    تستحمل بقى اللي كانت تعبانة في الكاسيت ولا ربنا يبعتلك اللي مخه تعبان أكثر؟

     
  • في السبت, مارس ٢٨, ٢٠٠٩ ٦:٠٠:٠٠ م , Blogger نبض اسكندرية يقول...

    اسفة لعدم المتابعة الجيدة

    لكن تصور انى اكتر حاجة فكرت فيها انك تقرى كتاب وانت راكب المواصلة عشان تشغل نفسك حتى ان تحن عليك ازمة المواصلات انك تروح الشغل

    انا بعمل حاجة احسن يا محمد حاول تجربها هتلاقى نفسك ريحت ودانك وعنيك والناس السميعة اللى حواليك

    انا بسمع الردايو وانا راكبة عشان اشغل نفسى عن قلق المواصلات والتفكير فى الدقيقة اللى بتبقة عايزها متشميش عشان امنية حياتك تروح الشغل بدرى مرة

    ابقة جربها وقولى رايك

    سلامى للعبدين ولشخصك الكريم
    تحياتى

     
  • في السبت, مارس ٢٨, ٢٠٠٩ ٩:٣٢:٠٠ م , Blogger طالبه الفردوس يقول...

    غرباء
    طوبى للغرباء
    هكذا اصبح المستمسكين بالدين اما المقصرين فاصبحوا هم العادى ربنا يهديهم

     

إرسال تعليق

الاشتراك في تعليقات الرسالة [Atom]

<< الصفحة الرئيسية