فــي الــصــمــيـــم

لما الضماير تهون شوف اللي ممكن يكون تخدع وممكن تخون وتصاحب الشيطان بس في نهايه المصير الحق صوته يبان

الأربعاء، ديسمبر ١٣، ٢٠٠٦

وطـن الـمـخـتـل

تستطيع ان تتوقع اي نهايه لاي جريمه تحدث داخل مصر ودون ان تنتظر نتائج البحث الجنائي وتخرج علينا التصريحات السريعه من وزاره الداخليه وتوضح انها توصلت الي الجاني بسرعه طريقه ولكن للاسف انا الجاني مختل عقليا.تلك الحبكه السحريه للتخلص من الحاح الرأي العام والهروب من واقع المسئوليه
فالامس اعلنوا ان التوربيني قائد عصابه الاعتداء وأغتصاب وقتل الاطفال مختل عقليا
وقبله كان المصلي الذي اعتدي علي خطيب الازهر يطالبه بتوجيه الكلمات الي الحكومه لتخفيض مبالغ العلاج لوالدته المريضه كان مختل عقليا
وقبله سفاح بني مزار كان مختل عقليا حتي ثبتت برأته وحتي الان لم يظهر مختل عقليا اخر يحمل تلك التهمه
وقبله شاب الاسكندريه الذي اعتدي علي المسيحيين امام الكنائس كان مختل عقليا وغيرها وغيرها من جرائم المختلين
تلك الشماعه الجاهزه والحجه الواهيه التي تحاول وزاره الداخليه ان تقنع بها المواطنين وان كل جريمه ابحث وراءها لتجد اي مختل عقليا
حجه واهيه تدل علي مدي القصور الامني الذي نعيشه الان.فأصبحت مصر بلد المختلين فلماذا لا يوجد مختلين في العالم الا في مصر وكأنها اصبحت عباسيه العالم اجمع
اين دور الامن وكشف العصابات هذه قبل ان تقع الجريمه فهذا هو دورها ليس البحث عن الجاني
فالتوربيني مثلا شاب في الخامسه والعشرين من عمره ومنذ سبع سنوات وهو يمارس تلك الجرائم علي حد قولهم .اين كانت الشرطه ؟
الشرطه متفرغه لقمع المتظاهرين.متفرغه لسحل كل من يطالب بحقه . متفرغه للقبض علي الطلبه في الجامعات. فهناك اعمال اهم من المحافظه علي الامن العام ابدي من انتشار الجرائم .حتي يقال في النهايه كله تمام يا فندم
فالجرائم تتوالي وتكثر ومن يريدوا منها ان يخمد بيجبروا الشعب علي نسيانها مثل حادث العباره(السلام 98) ولكن هذه المره لم يكن مختلا بل هاربا وبلا فخر اوتعب وعباء البحث الكل يعلم اين هو ولكن؟؟؟؟؟؟؟؟
اتمني الا يأتي اليوم الذي يصبح فيه كل من يسير في الشارع مختل عقليا او كل من يعبر عن اراءه مختلا

36 تعليقات:

  • في الأربعاء, ديسمبر ١٣, ٢٠٠٦ ٥:٠٧:٠٠ م , Blogger ياسر شمس الدين يقول...

    يا حاج مصر زى ما انا قولت قبل كده مصدرا لتصنيع المجرمين مين هيدافع عن التوربينى ده ولا مين هيدافع عن اى مختل عقلى اهى قواضى بتتقفل وما حدش هيسال عن الناس ديه حتى اهلهم عايزين يخلصوا منهم والحكومه بتخلص عليهم مش جديده مش المتخلفين بس اللى بيتاخدوا فى قضايا فشنك مصر كلها بيحصل فيها كده لازم كل حاجه فى البلد ديه تتغير

     
  • في الأربعاء, ديسمبر ١٣, ٢٠٠٦ ٥:٥٩:٠٠ م , Blogger كلبوزة لكن سمباتيك يقول...

    عندي اعتقاد ان وزارة الداخلية- ملحوظة لا علاقة لاسم الوزارة بالملابس الداخلية و انما هو تشابه في الاستخدام فقط-عندها قائمة باسماء المختلين عقليا جاهزة الاعداد تحسبا لاي حدث جلل تقوم تطلع اسم منهم و تصدره في وش المدفع


    بيتعبوا قوي صراحة





    يا رب انت على المفتري


    -
    خالص تحياتي

     
  • في الأربعاء, ديسمبر ١٣, ٢٠٠٦ ٩:٣٢:٠٠ م , Anonymous غير معرف يقول...

    يا بني كل ده مش غريب ف بلد رئيسه نفسه مختل عقليا
    امضاء
    رئيس الوحدة السابعة ف التنظيم السري للمختلين عقليا
    او
    نسرين

     
  • في الأربعاء, ديسمبر ١٣, ٢٠٠٦ ١٠:٤٣:٠٠ م , Anonymous غير معرف يقول...

    والله يامحمد انت قولت المفيد كله البلد كلها بقت مختلين عقليا هي دي حكومتنا عادتها ولا هتشتريهاوالعيب ع الناس اللي بتصدق وتسكت بس هنقول ايه في ايديهم ايه يعملوه ماالشعب كله مغلوب علي امره
    ربنا يصبر الناس اللي بيتظلموا ويتاخدو ظلم وربنا يجازي كل ظالم
    وهفضل في كل مرة اقول حسبي الله ونعم الوكيل والله مااحنا عارفين احنا رايحين فين
    ربنا يستر زي مانت قولت لابعد كده يكون كل اللي ماشي في الشارع مختل ولا كل اللي يقول رايه مجنون ومعتوه
    ربنا يصبرنا يااااااااااااااااااااااارب علي مابلانا

     
  • في الخميس, ديسمبر ١٤, ٢٠٠٦ ١٢:٣٩:٠٠ ص , Blogger rony يقول...

    لا لا لا لا كده ازعل يااستاذ محمد والله اولا علشان حضرتك شايف اننا وطن مختلين ومش بتراعى حاله الوطن الصحيه
    وثانيا علشان حاسه بنبره يأس فى كلام حضرتك وده مينفعش
    المهم بقى دلوقتى ياريت تسمحلى انا ارتدى روب المحاماه وادافع عن مصرنا الحبيبه بالاقتباس من كلمات ولى العهد للاهرام يوم الثلاثاء 12_11_2006
    "اعلن السيد جمال مبارك الامين العام المساعد وامين السياسات بالحزب الوطنى الديموقراطى ان التجاذب والحوار المفتوح والسجال السياسى التى تشهدها مصر حاليا عناصر قوه وليست عناصر قلق فمصر تمر بمرحله تحول صحى والسجال السياسى مصدر قوه وليس مصدر ضعف وقال:انه لا يمكن تحديد زمن التحول فهى مرهونه بوقتها"
    يعنى الاستاذ الدكتور جمال مبارك قالنا ان مصر بعافيه شويه اليومين دول وعندها (سجال سياسى) ومش عارفين فتره حضانه المرض قد ايه ولا عارفين فتره النقاهه قد ايه
    بس احنا لازم نستنى لان واضح ان اعراض المرض كلها تتمحور حول افراز جيل جديد من المختلين الكبار علشان ينتجوا مختلين اصغر منهم....وهلم جرجر
    ياريت نصبر على مصر شويه وندعيلها ربنا يقومها بالسلامه

     
  • في الخميس, ديسمبر ١٤, ٢٠٠٦ ١٢:٥٣:٠٠ ص , Anonymous غير معرف يقول...

    بس لما حجت المجنون ده تخلص ...هيقولوا إيه تانى ؟؟
    ....
    خلى بالك ...صوت بدأ يعلى ....وطى
    صوتك ...لحسن يقولوا عليك مختل عقليا
    ::)

     
  • في الخميس, ديسمبر ١٤, ٢٠٠٦ ١:٥٣:٠٠ ص , Blogger مُزمُز يقول...

    يا عزيزي كلناااااااا

    مختلووووووووووووووووووووووون

    بلا أدنى شك

     
  • في الخميس, ديسمبر ١٤, ٢٠٠٦ ٤:٢٥:٠٠ م , Blogger محمد أبو زيد يقول...

    المختل العقلي الحقيقي هو من يصدق أن هناك مختلا عقليا فعل هذا ، ففي قضية بني مزار بعد ان طلع المختل براءة ، طلع مش مختل ولا حاجة ، وفي اعتقادي أن هذه الحجة ، حجة أن من يقوم بهذه الجرائم مختل ، يحاول بهاالنظام أن يقنع الناس أن ما فعله هؤلاء الاشخاص ليس لهم يد فيه ، وأن الحياة حلوة ، وكل حاجة تمام ، والمواصلات فاضية ، والشغل كتيييييييييييير ، بس النفس تشتغل ، والشقق فاضية ، ومافيش أي مشاكل ، وبالتلي ما فعله هذا المختل هو كفر بالنعمة اللي معيشاه فيها الحكومة ، وعشان كده هو مختل

    أما حكومة مختلة بصحيح

     
  • في الخميس, ديسمبر ١٤, ٢٠٠٦ ١١:٣٣:٠٠ م , Anonymous غير معرف يقول...

    التخلف الحقبقي هو اننا راضين علي الذل والمهانة لذلك لازم نكون متخلفين

     
  • في الجمعة, ديسمبر ١٥, ٢٠٠٦ ٩:٠٤:٠٠ ص , Blogger ALiaa يقول...

    محنا كلنا معرضين لتهمة الاختلال العقلي.....واضح ان الجينات حصلها طفرة و بقي كلنا عندنا ميل للاختلالات

     
  • في الجمعة, ديسمبر ١٥, ٢٠٠٦ ٣:٥٣:٠٠ م , Blogger gamal يقول...

    استاذ محمد
    مقالتك هذه لها كل الأحترام والتقدير
    ورنا يخليك لينا ويحميك من الأختلال العقلى أحسن بوادر الأعراض بدأت تظهر اليومين دول فى مجتمعنا
    لك تحياتى

     
  • في الجمعة, ديسمبر ١٥, ٢٠٠٦ ١١:٢٣:٠٠ م , Blogger mariam يقول...

    للأسف سهل جدا تقفيل اى قضية على ان مرتكبها مختل
    لأن محدش فاضى يبحث او يدور على الجانى
    هما بس كفاية عليهم تأمين الكبار
    اما المواطنين فكل واحد مسؤل عن نفسه

     
  • في السبت, ديسمبر ١٦, ٢٠٠٦ ٥:٥٦:٠٠ ص , Blogger love4u يقول...

    مختل عقليا
    فعلا
    احنا مختلين عقليا لاننا بنتعامل مع نظام
    مختل فى حركته السياسيه و غير متوازن فى توجهاته القوميه
    و متردد فى خطواته المستقبليه
    و اصل انا عندى شعره ساعه تروح و ساعه تيجى

    كلام كله صح
    بس بقلك ايه كبر دماغك اهم حاجه تكبر دماغك هشان تشوف الامور واضحه و تفهم مين صح و مين غلط و مين مع مين و مين ضد مين و مين كان مع مين و بقى دلوقتى مع مين
    و فين الصحافه و اصبحت فين

     
  • في السبت, ديسمبر ١٦, ٢٠٠٦ ١١:٠٤:٠٠ ص , Anonymous غير معرف يقول...

    رب ضارة نافعه
    ممكن ان يفعل المرء ما يحلو له ليخرج بكفاله العقل المختل ,
    وممكن ان نفتح جمعيه للمختلين لتوجيه اختلالهم ومن ثم ممكن نحوله الى مستشفى وكله خلل عقلي ,ممكن يقتل جار الله عمر لدينا في اليمن سياسي اشتراكي ومفكر وبعدها نقول متطرف مختل عقليا قتله وممكن سفاح جامعة صنعاء الذي قتل, فتيات ولم نستطع معرفة بقايا الجرائم لانه ثبت اختلال عقله والذي هو الدافع لجرائمه !!الفرق الوحيد بيننا وبينكم انهم يعدمون المختل عقليا حتى لايراه اخرون في مكان آخر
    اعتقد ان الخلل العقلي لدينا بقبولنا لكل ذلك

     
  • في السبت, ديسمبر ١٦, ٢٠٠٦ ١٢:٣٧:٠٠ م , Blogger dandana يقول...

    وما الوطن الا مستشفى مجانين كبييييييييييييييييييييييييييييييييييييييييييييييييير

    ولا اجدع دكاترة طب نفسى فيكى يا مجرة يقدروا علينا...

    احنا لما بنحب نتقن حاجة ...بنتقنها اوى

     
  • في السبت, ديسمبر ١٦, ٢٠٠٦ ٣:٠٨:٠٠ م , Blogger Dananeer يقول...

    فى الجون يا محمد بجد

     
  • في السبت, ديسمبر ١٦, ٢٠٠٦ ٨:٤٦:٠٠ م , Blogger هيثم محفوظ يقول...

    إزيك يا باشا
    إنت إيه رايك يا مفيد فى اللى عملوه الاخوان من تلات ايام فى جامعة الازهر و فى تصرف مبارك معاهم
    إلى اى مدى حاسس بالصدق
    المهم
    إياك ماتجيش حفلة الساقيه يوم تلاته و عشرين
    هاخنوووووقك
    التذكره بعشره جنيه :)
    إبرزها و تعالى

     
  • في السبت, ديسمبر ١٦, ٢٠٠٦ ١١:٥٩:٠٠ م , Blogger tota يقول...

    العزيز محمد

    الداخلية المصرية عبارة عن كتلة تقصير وسبة فى جبين مصر

    هى دورها الوحيد هو حماية الحكومة من الشعب الغادر المختل عقليا

    اغلب القضايا يتم اكتشافها عن طريق الصدفة البحتة لا ادلة جنائية ولا بحث ولاطب شرعى والحمد لله مفيش اسهل من الحصول على الاعتراف بوسائل التعذيب المبتدعة والمتجددة دائما والاعتراف سيد الادلة حد ينكر

    واذا احنا مغيرناش الوضع عمره ما هيتغير لوحده حتى لو قالوا علينا مختلين
    لنكن مختلين بلا حدود اذا كان هذا سوف يغير الداخلية

    تحياتى

     
  • في الأحد, ديسمبر ١٧, ٢٠٠٦ ٤:٤٨:٠٠ ص , Blogger بعدك على بالى يقول...

    يبدو اننا فعلا مختلين عقليا لاننا ساكتين على كل اللى بيحصل ده

     
  • في الأحد, ديسمبر ١٧, ٢٠٠٦ ٩:٢١:٠٠ ص , Blogger متغيرة شوية يقول...

    اي حد اتعامل مع الشرطة نتيجة أي حادثة اتعرض ليها شاف انها لا بتودي ولا بتجيب..معندهمش وقت لمشاكل المواطنين المدلعين دول..
    دول ناس بيشتغلوا يابابا ووراهم ناس كتير قوي لازم يتضربوا ويعتقلوا ويتسحلوا ..هيبصوا بقى لواحد بيغتصب عيال ويقتلهم؟ ولا لرجالة بيتحرشوا ببنات؟
    الظابط الصغير بيروح للظابط الكبير يقوله حصل كذا كذا يا باشا..
    يرد عليه الباشا يقوله:" هات مختل عقلي من المخزن واقلب ، احنا مش فاضيين"

     
  • في الأحد, ديسمبر ١٧, ٢٠٠٦ ١٢:٣٧:٠٠ م , Blogger LAMIA MAHMOUD يقول...

    وياريتها تيجي على المختلين عقليا وما يدوروش على العاقلين ويجننوهم

    امبارح وانا بتفرج على الحقيقة كان عندي احساس ان حييجي يوم الواحد ينام فيه يصحى يلاقي نفسه قاتل خمسين قتيل في الحلم


    وايام سفاح بني مزار على حد قولهم وقتها كان في حوار مع المذيع كان بيقوله دخلت البيت ازاي قاله من الباب قاله الباب كان مقفول قاله يبقى من فوق الحيطة
    يعني اللي اصحاب العقول في راحة


    مصر بقت يا مختلين عقليا يا محتلين عقليا

    ادخلوها بسلام آمنين:)

     
  • في الأحد, ديسمبر ١٧, ٢٠٠٦ ٤:٢٠:٠٠ م , Anonymous غير معرف يقول...

    ممكن أضرب المدير بتاعي وتقول عليا مختل عقليا
    -= Mafia =-

     
  • في الأحد, ديسمبر ١٧, ٢٠٠٦ ٥:٠٥:٠٠ م , Blogger smraa alnil يقول...

    حسرتني علي حالي دة اكتر مانا متحسرة
    بس حسبي الله ونعم الوكيل
    تصدق ان واحد من امن الولدة برضه قال عليا اني مختلة عقليا عشان كنت عايزة اخش في مظاهرة
    جايز يكون عنده حق
    قد اكون مختلة اني مش قتلته ولا جبته الارض بشوية حركات من الكاراتية علي مصارعه روماني
    علي اي حال
    مختلين في وطن مختل زي مانت قلت

     
  • في الأحد, ديسمبر ١٧, ٢٠٠٦ ١٠:١٠:٠٠ م , Blogger حنيــــــن يقول...

    معنديش كلام أقوله بعد كلامك والتعليقات دى

    متفقه تماما مع محمد ابو زيد فى ان المختل العقلى الحقيقى هو اللى يصدق ان مختل قام بكل الافعال دى

    حبى الله ونعم الوكيل

     
  • في الاثنين, ديسمبر ١٨, ٢٠٠٦ ٣:٣٦:٠٠ ص , Blogger albida يقول...

    اللى مستغرباله فعلا هو ايه سبب استخدمهم للحجة (الحمضانة) دى كل مرة؟!! يعنى هو كونه مختل عقليا يمنع أنهم كانوا يكتشفوا أمره بدرى؟

    أنا فعلا مؤمنة بأن اللى بيرتكب الجرايم البشعة دى لازم يكون شخص مريض نفسيا.. ولكن ايه اللى خلاه يعمل كده؟ ايه العوامل والظروف اللى حورته بالشكل ده؟ الأجابة واحدة فى كل مرة

    شكلهم كده مش هيرتاحوا الا لما يخلوا الشعب المصرى كله ماشى بكسرولات على دماغه

    manal

     
  • في الاثنين, ديسمبر ١٨, ٢٠٠٦ ٢:٢٢:٠٠ م , Blogger بين الأمل و اليأس يقول...

    انا عايز اعرف هو الوطن ده عباره عن ايه مش ارض وشعب وحكومه وبيتهيألي لو حاجه وقعت يبقه اكيد مفيش وطن
    ومين الي عمل الحكومه مش الشعب ومين الشعب مش احنا يبقه العيب فين اكيد فينا
    العيب اننا سكتنا مره واتنين لغاية لما خلينا الحكومه هي الوطن ونسيو ان الوطن هو ارض وشعب وحكومه
    يبقه للحكومه حق والف حق لما تقول ده بريء وده مذنب وده دفع يبقه هايوصل لمصلحته على قفى اللي حوليه
    احنا اللي عملنا الحكومه
    بس قولوا يارب ونقدر نصحي الشعب ونقويه ومايخفش عشان مانجيش نقول الحكومه عملت والحكومه خلت ونتهمها في الوكن ونقول مختل
    معلش اصل الكلام حرق دمي قوي وحسيت فعلا اننا بقينا مجرد دمى بتتحرك من ناس بنيأدمين زيناوايه احنا اللي خلينهاهم اعلى مننا
    واستمر لعل الكلمات توقظ الضمير فينا ونتجمع لنستعيد وطننا مصر اللي هاتفضل ام الدنيا بس لو يفوق اهلها
    هو لغبط ولا حاجه بريييييء يابيه
    ؛))
    وربنا يسترها

     
  • في الاثنين, ديسمبر ١٨, ٢٠٠٦ ٣:١٤:٠٠ م , Blogger قلم جاف يقول...

    أموت وأعرف ليه بيقولوا عن كل دول مختلين؟

    هل لتبرئة ساحتهم مثلاً؟

    هل للتخفيف من أخطائهم؟

    هل لتسطيح مشاكلهم؟

    نمسك واحدة واحدة..

    مختل بني مزار مش مختل ويمكن يكون فعلاً اللي عملها .. أحمد خالد توفيق كتب مقال عبقري في الدستور بيحلل فيه النوعية دي من الجرائم بشكل علمي ، ولأن الكلام علمي فما جاش على مزاج الصحفجية التليفزيونجية اللي احتلوا ماسبيرو وشغلوه لحسابهم ، وما جاش كمان على دماغ بعض صحف المعارضة اللي ما لهاش هم إلا الإثارة .. وكانت النتيجة الطبيعية إن الناس نست الجرائم البشعة المنسوبة وتفرغت لإخراج مختل بني مزار من السجن!

    لا يمكن يكون الشخص اللي حاول الاعتداء على إمام مسجد الحسين مختل عقلياً ولا ضريب بانجو .. وأظن إنه من الصفاقة بمكان إنك توصل الشخص لآخره وبعد كدة تشتمه وتهاجمه .. زي الحرامي اللي جه يسرق واحد ما لقاش معاه حاجة قام نازل فيه ضرب وقال للضحية : عكننت عليا الله يخرب بيتك!.. وكان للعبد لله كلام في الموضوع..

    http://eldeenweldenameet.blogspot.com/2006/12/blog-post_03.html

    التوربيني ليا كلام عنه بعدين إن شاء الله..وما أعتقدش إن البحث الاجتماعي وشغل "الهبل في الجبل" اللي اتعمل في البيت بيتك ودريم حيوصل لحاجة بشأنه.. دي قناعتي على الأقل..

    حتى البيروقراط اللي بيسرقوا مصر ماهماش مجانين..

    بالله عليكم .. مين المجنون في مصر دلوقت؟ أعتقد اللي يصدق إن كل دول مجانين ..

    وسك ع البك!

     
  • في الاثنين, ديسمبر ١٨, ٢٠٠٦ ٩:٣٨:٠٠ م , Blogger elgharep يقول...

    حاجة تكسف لا عمل للأمن الا تلبيس التهم جزافا فالبحث الجنائى فى مصر لا يعتمد الا على الصدفة وبركة دعاة الوالدين بينما تجد أمن الدولة الله ينور مفيش أنشط من كده بيسجل ده ويعتقل ده بكل نشاط وحيوية
    حسبى الله ونعم الوكيل
    الغريب

     
  • في الاثنين, ديسمبر ١٨, ٢٠٠٦ ٩:٤٥:٠٠ م , Blogger Lion king يقول...

    صديقي العزيز
    محمد باشا
    انا الي مقصر معاك تحياتي

    على فكرة انا كتير بيجي التفكير دا على بالي سبحان الله توارد افكار

    وبحس ان ازا الناس متجننتش ظاهريا
    فا من كتر الكبت الي هما فيه بيتجننوا بس محدش بيحس بيهم وبيفضلوا كابتين دا وبيأثر على نفسيتهم وشغلهم وبيتهم وحتى الاولاد بيتحرموا من الصحة النفسيه الي المفروض يعيشوا فيها
    بجد ربنا يسترها علينا ويقوي ايماننا
    وينجينا من الجنان ومن الظلم ومن كل سوء انا وانت وامه محمد عليه الصلاة والسلام
    تحياتي يا برنس

     
  • في الاثنين, ديسمبر ١٨, ٢٠٠٦ ١٠:٥٥:٠٠ م , Blogger جميله بو حريد يقول...

    الاختلا ل هو سنه الحياه على من يكتب عليه ربنا ويعيش على ارض مصر المحروته بالزمه اللى يستحمل المواصلات وتلوث الجو وفساد الحكومه و والتعليم المصاب بشلل رعاش اقل حاجه تجيله انه يكون مختل يعنى الداخليه مش بتكدب بس هناك ملحوظه بسيطه ان الشعب المصرى كله مختلين صامتين مش بس اللى بيقبضوا عليهم يعنى كل مصرى معاه حصانه انه يروح يفجر المكان اللى هو عاوزه لان الداخليه ربنا يخليها لينا هاتطلعنا منها زى الفل مجرد بس انها هاتثبت فى الاوراق الرسميه انه مختل رسمى بدل ما كان مختلى صامت

     
  • في الثلاثاء, ديسمبر ١٩, ٢٠٠٦ ٩:٢٧:٠٠ ص , Blogger Heba Al_Menshawy يقول...

    امسك مختــــــــــــــــل
    ما هي موضة هنا الايام دي .. وبعدين اذا كنا اصلا عايشين في مستشفى المجانين واللي ماسكين البلد مجانين والكل مختل .. اتعودنا خلاص سواء التوربيني ولا بتاع بني مزار اهو القضية تقوم وتكبر وتنزل على مفيش وولا نعرف ايه اللي حصل بعد كدا.. هسسسسسسس
    بلد مختلين والله
    :(
    لينا ربنا

     
  • في الثلاثاء, ديسمبر ١٩, ٢٠٠٦ ١١:٤٦:٠٠ ص , Blogger الاء سعود المجيبل يقول...

    متابعه... موضوع مشوق وردود مشوقه...:)

     
  • في الثلاثاء, ديسمبر ١٩, ٢٠٠٦ ١:٣٦:٠٠ م , Blogger Spotat Lena يقول...

    بس انا اللى على حافة الوطن المختل
    و معنديش شفعاء ولا دكاتره شغالة ف عنبر المرفوع عنهم القلم
    مصيري اكيد هيبقا معروف
    لو هبت " فكرة " انقلاب والا ضرب نار
    ف دماغي ..
    احنا عباقرة مقبورين !

    محمد مفيد يا فنان .. (f)

     
  • في الثلاثاء, ديسمبر ١٩, ٢٠٠٦ ١:٤٩:٠٠ م , Blogger أجدع واحد في الشارع يقول...

    مش عارف اقولك ايه
    الناس قالت كل حاجة
    بس بجد انت فى الصميم

     
  • في الخميس, ديسمبر ٢١, ٢٠٠٦ ٢:٥١:٠٠ م , Blogger n يقول...

    بيقولوا ان دلوقتي بقى فيه اعلان ثابت كل يوم في المبوبة بيقول مطلوب مختل عقليا للتعاون مع وزارة الداخلية

     
  • في الاثنين, يناير ١٥, ٢٠٠٧ ٨:٤٨:٠٠ م , Anonymous غير معرف يقول...

    ياريت بس ع التوربينى ده في كمان حاجه اسمها السفاح وحاليا يزاول نشاطة فى المعادى والمنطقة التاليه هى الوايلى بس يامحمد

     

إرسال تعليق

الاشتراك في تعليقات الرسالة [Atom]

<< الصفحة الرئيسية