فــي الــصــمــيـــم

لما الضماير تهون شوف اللي ممكن يكون تخدع وممكن تخون وتصاحب الشيطان بس في نهايه المصير الحق صوته يبان

السبت، مايو ١٢، ٢٠٠٧

تحيا مصر يا عم الحاج

نزلت اخر الاسبوع الي مدينه بنها لزياره اقاربي وقضاء اجازه قصيره هناك .وأول ما دخلت لقيت خير اللهم اجعله خير عساكر ايه وظباط ايه ولواءات ايه أمم ماليه الشارع و كردونات وبوكسات وحكومه ايه
علي فكره بنها من المدن الجميله جدا ومن اهدأ المدن اللي شوفتها بحب جدا اروح هناك بستمتع بجد
سألت عمي: هو الحرب قامت عندكو والا ايه ؟
قالي : مدير الامن الجديد عامل قلابان ومبدهل الدنيا من ساعه ما مسك واحنا في حظر تجول الخروج بميعاد والنزول بميعاد والدنيا اخر قرف
أذن الفجر ونزلت أصلي الفجرلقيت المسجد فاضي استغربت شويه
صليت ودخلت علي الصيدليه اشتري دواء سخونيه لابني عبد الله كان تعبان شويه
لقيت الصيدلي استغرب جدا وانا داخل وبيقولي خير ووشه احمر ايه
قولت له خير عايز دواء شخونيه ؟ جابي الدوا وبعدين سألته : في حد بيبيع جرايد هنا
قالي : حضرتك انت مش عارف في ايه الدنيا مقلوبه وتقولي جرايد الفجر مفيش يا عم ولو عايز روح هات من محطه القطر
خدت الدواء وخرجت وقولت اروح اجيب الجرايد اهي مش بعيد
دخلت محطه القطر لقيت الدنيا فاضيه قولت هو في ايه يا بشر؟
اشتريت المصري اليوم وخرجت وانا بقرأفيها وانا ماشي كده مع الجو الجميل والشوارع الفاضيه لقيت واحد كده جاي بيجري عليا وبيقولي بصوت تخين انت رايح فين يا استاذ ؟
قولت له : ليه
قالي :انت مش عارف في ايه ؟
قولت له: هو كل بنها النهارده عماله تقولي انت مش عارف في ايه ؟
قالي :هو حضرتك مش من هنا ؟
قولت له: لا ء من القاهره
قالي: خلاص خلاص
قولت :ليه في ايه بقي اناعايز اعرف وقفتني كده وبعدين تقولي خلاص ؟
قالي (الظابط شكله قرفان من عيشته وعمال يسب ويلعن في الورديه وكل حاجه حواليه ) اصل طلاب جامعه بنها هيعملوا مظاهره النهارده واحنا عايزين نحتويها من الاول قبل ما تكبر
قولت له: والحكايه تستدعي كل الهيصه دي
قالي: نعمل ايه طلبات الباشا
قولت له : باشا مين؟
قالي : الباشا مدير الامن
وبعدين حضرتك مش حاسس ان البلد كده أمان ومفيش مشاكل والكل ساكت كده
قولت له: وده بقي بأي منطق توقف اي حد كده وتسأله انت رايح فين ؟
قالي : والله دي أوامر نعمل ايه بقي
وبعديواحنا بنتكلم لقي واحد خارج من محطه القطار راح سايبني وراح عليه
سبته ومشيت وبعد شويه كده ببص ورايا لقيت الظابط ماسك الراجل والبطاقه بتاعته وواخده علي البوكس
يا سلام يابلد الامن والامان
تحيا مصر ياعم الحاج

24 تعليقات:

إرسال تعليق

الاشتراك في تعليقات الرسالة [Atom]

روابط هذه الرسالة:

إنشاء رابط

<< الصفحة الرئيسية