الاباء والابناء

دايما كنت بحب انزل بدري وأروح الشغل بدري لكن بعد الأستاذ عبد الله ما دخل الحضانة وأنا بنزل كل متأخر وأروح متأخر بس مش بزعل زى لما كنت بروح متأخر لظروف
غريبة أوي حكايتي مع عبد الله أنا مش بحبه لاء أنا بموت فيه ونفسي يبقي أحسن واحد في الدنيا وبفكر فيه كده وفي أيامه وازاي حال البلد علي أيامه هتنصلح وألا هتفضل زى ما هي كده
وأنا بلعب معاه وأنا بتخانق معاه وأنا بزعق له وأنا قلقان عليه لما بيكون تعبان
ده لما كان تعبان أنا ماروحتش الشغل ولا كنت بأكل ولا اشرب وكنت علي أخري ومش طايق حد يكلمني
قولت بعد ما عبد الله الحمد لله بدأ يخف

هوة أبويا كان بيعمل معايا زي ما بعمل مع عبدالله كل ده وأنا مش حاسس ؟
لما أبويا بيحبني زى ما أنا بحب عبد الله كده
طيب ليه لما أبويا بيحبني كل الحب ده زى اللي أنا بحبه لعبد الله ليه كنت بزعله وكنت بضايقه؟

ياااااااااااااااااه

اعترف أني كنت زمان شقي أوي وبناع مشاكل وبحب الجري والتنطيط وكنت دايما ازعل أبويا مني لكن بجد والله ما حسيت قد أيه أبويا بيحبي بجد ألا لما ربنا كرمني ب عبد الله
وعلي فكره كل اللي عملتو في أبويا زمان بيطلع عليا دلوقتي :)

لذلك بجد والله العظيم أي واحد أو واحده والده أو والدته عايشين يجري بجد ويلحق يقرب منهم ويبوس رجليهم قبل أيديهم لأنهم دول والله الناس الوحيدة اللي بتحب بدون ما تستني المقابل بتحب وعايزه ابنها أو بنتها تبقي أحسن واحده في الدنيا واللي والده أو والدته متوفيين يدعو لهم بصالح الدعاء ويحتسبهم عند الله عز وجل لأننا بجد من غيرهم أحنا ولا حاجه

وأنا قدام الناس كلها اهو يا عم مفيد بقولك

ربنا يخليك لينا وحقك عليا لو كنت زعلتلك في يوم أنا برضو زى ابنك
:)