فــي الــصــمــيـــم

لما الضماير تهون شوف اللي ممكن يكون تخدع وممكن تخون وتصاحب الشيطان بس في نهايه المصير الحق صوته يبان

السبت، يوليو 26، 2008

ليه كده يا شيكو ... ؟

في البوست السابق سألت سؤال خطر علي بالي في لحظتها وهو أحنا لسه قادرين نحلم ؟ وجاءت تعليقات ولكسلي الشديد وعدم متابعتي بعض الشئ لم أرد علي التعليقات . أن جاء هذا التعليق
أكيد مفيش احلام علشان حد يحلمها اصلا خلاص بح المولد خلص اللى حلم حلم واللى حقق حقق انت بتتكلم فى اية ؟لو انت رجل اعمال او ابنة او وزير او ابنة بس من حقك تحلم وانت فاهم و انا فاهم و انت عارف انا سافرت احلم مرتين ودى المرة التانيةبس علشان تحقق حلمك برة بلدك لازم تدوس على كرامتك ومبادئك وتفكر فى الفلوس بس وفى بلدك برضة تدوس على كرامتك بس مش هاتحقق حاجة بس انت تفضل ايه تدوس عليها فى بلدك ولا بلد غريبة ؟ انا برة بلدى و انت عارف اجابتى بس علشان خاطرى عايز اجابتك يا صديق عمرى بس بصراحة واسأل اصحابك يمكن افيدهم واغير شوية من تفكيرهم بس اكيد يا صاحبى
من صاحبك فى الغربة (شيكو )
شيكو أو محمد نبيل من أوفي ما قابلت علي وجه الارض صداقه وأخوه أكثر من عشر سنوات. شخص عنده طموح يكاد يكون يعانق السماء . أيام الجامعه كان الجميع ينظر الي النجاح والذهاب الي ماهو بعد ذلك الا هو . كان ينظر ماذا سيفعل بعد التخرج ويتحدث معك وتجد أمامك الأمل متجسد في هيئه رجل
بعد التخرج وجد أمامه كل الابواب مغلقه فقرر قرار السفر الي الخارج ولم يعلم به أحد الا وهو يحدثني يومأ علي الموبيل أنا علي حدود ليبيا يا شقيق عايز مني حاجه ؟ وسافر وعاد وأخذ يفكر في العمل هنا الي أن جاءته فرصه عمل أخري في دوله الإمارات ونفس الحال هو هو. ولكن نبرته قد تغيرت وكان تعليقه علي موضوعي بمجرد الصدمه بالنسبه لي والحاحه عليا اني أجاوب انا علي السؤال. تعجبت من تحول حلم شيكو ومن تغير وجهه نظره . هذا الشخص الذي كان الوقود لجميع أصدقائي للمساعده علي هموم الدنيا .
الاجابه بتاعتي يا شيكو وبدون لف ودوران . أحنا مش قادرين نحلم لاننا ببساطه مش عارفين نعيش
بص في الوشوش اللي ماشيه في الشارع ؟
بص في الناس اللي رايحه اشغالهم ؟
بص للشباب اللي بينحت في الصخر ؟
مش يأس والله ولكنه فاض الكيل بينا
عارف أن الغربه صعبه ومحدش فيها بيسأل عن التاني لكن صعب أوي لما تحس أنك غريب وانت في بلدك
شيكو والله العظيم وحشتني يا صاحبي
****

التسميات:

10 تعليقات:

  • في السبت, يوليو 26, 2008 9:46:00 ص , Blogger محمد عبد الغفار يقول...

    هو اظاهر اناعايش فى بلد تانيه

     
  • في السبت, يوليو 26, 2008 1:25:00 م , Blogger آلام وآمال يقول...

    ولا حول ولا قوة الا بالله

     
  • في السبت, يوليو 26, 2008 3:11:00 م , Blogger نونو يقول...

    لا حول ولا قوة الا بالله
    ربنا يعينا كلنا
    تحياتي

     
  • في السبت, يوليو 26, 2008 3:30:00 م , Blogger ابن ادم يقول...

    ايه يا جماعه الاحباط ده !!

    ما هو الطموح و الشغل و الفلوس ديه ايه ما كله بايد ربنا عز وجل ..

    كله رزق .. و كل واحد مكتوب له رزقه في الدينا .. يعني هتاخده هتاخده

    و لو الباب اتقفل في وشك مره و اتنين و تلاته .. اكيد هيتفتح في الرابعه

    خلوا عندكوا امل في ربنا .. مش في الشهاده و لا في غيرها

    كله بايد ربنا .. و المهم ناخد بالاسباب

    و سلامو عليكم :)

     
  • في السبت, يوليو 26, 2008 6:39:00 م , Blogger صاحب المضيفة يقول...

    هناك دوا للإحباط ممكن الوحاد يستعين بيه يوم ماالدنيا تضيق بيه


    لون حياتك بالطعاة والزم الاستغفار هاتلاقي كل الأبواب بتتفتح قدامك والدنيا بقت وردي خالص


    ربنا يثبتنا على أملنا ويقطع عنا اليأس ويديم لنا الرجاء برحمته وعدله يارب


    تحياتي

     
  • في السبت, يوليو 26, 2008 11:45:00 م , Blogger ذو النون المصري يقول...

    طبيعي ان الانسان يتغير احساسه بتغير المواقف و احيانا كثيره اتحول كفرد من الثقه و الاطمئنان الي الياس الكامل و الاحباط الشديد
    لكنها عموما مواقف و مراحل بتمر

     
  • في الأحد, يوليو 27, 2008 12:31:00 ص , Blogger مصــــري..!! يقول...

    ما زلت واقفاً علي هذا الجسر اللعين.
    بين اليأس والرجاء

    أسامة

     
  • في الأحد, يوليو 27, 2008 9:52:00 ص , Blogger فى القلب يقول...

    ولو ولو برضه لااااازم نحلم مهما يحاولو

    وكثرت الضغوط

    لازم نحلم عشان ولدنا

    أحنا نحلم يمكن هما يحققو الحلم ولا أيه يا أبو العبدين

     
  • في الاثنين, يوليو 28, 2008 1:23:00 ص , Blogger يا مراكبي يقول...

    ما تلومش عليه .. مش هو السبب في إنه يقلب علينا المواجع .. المواجع محاصرة فعلا الناس كلها

    لكن دايما بعد العسر يسر مهما طال الزمن

    مسيرها تروق وتحلى .. حتى لو في آخر لحظة من العمر

     
  • في الاثنين, يوليو 28, 2008 1:48:00 ص , Blogger عاشقة الوطن يقول...

    السلام عليكم

    ازيك يامحمد

    هو اكيد مفيش احلام واكيد كنا زمان شئ وهنكون بعد كده شئ تانى

    وان كان شيكو كان زمان بيديكم الطاقة وامل فى بكرة فأكيد من اللى شافه فى بلده واللى اتعرض ليه برة بلده هيقلب كل احلامه الى لا شئ


    احنا ممكن نحلم اننا هنتولد من اول وجديد وفى بلد جديدة ومع ناس جديدة
    نحلم حلم بعيد شوية
    نحلم بحاجة احنا نفسنا مش هنعرف نحققها


    حلمنا ممكن يكون بسيط بس فى الاخر لازم نحلم
    ولو كان حلم مش هيتحقق

    وياريت نحلم ببلدنا انها انصلح حالها
    وياريت نقدر نحقق ده
    ونصلح فى بلدنا اللى خربها حكامها

    وربنا معاك يامحمد انت وشيكو

    وربنا يعينا جميعا على اللى احنا بقينا فيه

    تحياتى

     

إرسال تعليق

الاشتراك في تعليقات الرسالة [Atom]

روابط هذه الرسالة:

إنشاء رابط

<< الصفحة الرئيسية