ولكنه ضحك كالبكاء

فاز الأهلي وخرجت الجماهير الغفيره في حاله هوس تجوب الشوارع

وتجمعت الجماهير علي قلب رجل واحد من الصباح الباكر في الاستاد

لمشاهده المباره المصيريه

وفي أثناء الحشود الجماهيريه للاهلي والزمالك

يحترق فؤاد الشعب بأكلمه ونواح ولطم وعويل

ليس لضياع فلافيو هدف

ولا لهجمه أجوجو الخطيره

ولكن

بالحكم المعجزه في قضيه العباره الشهيره

ياعم اللي ماتوا دول فقرا

ملهمش ضهر ولا ديه

أيه المشكله لما يطلع براءه

يعني هو كان عمل أيه ؟

دول 1200 واحد بس

أيه الجديد ؟

يوسف والي اللي سرطن الدنيا كلها عايش وتمام التمام

وأحمد عز محتكر البلد وعال العال

وغيره وغيره

والشعب مسالم وبيتفرج علي الماتشات

ومسلسلات اللي مجننه الناس

وبيسمعوا اغاني كلها خبط ورزع

وضاربنها طناش

هو أحنا عايزين أيه بالظبط ؟

في مباراه للكره كلنا تمام

في جنازه لفنان كلنا أنتباه

شبعنا كلام وقرفنا

في ايه تأني متعملش فينا

والا اقولك

أربي العبدين أحسن لي

ليه كده يا شيكو ... ؟

في البوست السابق سألت سؤال خطر علي بالي في لحظتها وهو أحنا لسه قادرين نحلم ؟ وجاءت تعليقات ولكسلي الشديد وعدم متابعتي بعض الشئ لم أرد علي التعليقات . أن جاء هذا التعليق

أكيد مفيش احلام علشان حد يحلمها اصلا خلاص بح المولد خلص اللى حلم حلم واللى حقق حقق انت بتتكلم فى اية ؟لو انت رجل اعمال او ابنة او وزير او ابنة بس من حقك تحلم وانت فاهم و انا فاهم و انت عارف انا سافرت احلم مرتين ودى المرة التانيةبس علشان تحقق حلمك برة بلدك لازم تدوس على كرامتك ومبادئك وتفكر فى الفلوس بس وفى بلدك برضة تدوس على كرامتك بس مش هاتحقق حاجة بس انت تفضل ايه تدوس عليها فى بلدك ولا بلد غريبة ؟ انا برة بلدى و انت عارف اجابتى بس علشان خاطرى عايز اجابتك يا صديق عمرى بس بصراحة واسأل اصحابك يمكن افيدهم واغير شوية من تفكيرهم بس اكيد يا صاحبى

من صاحبك فى الغربة (شيكو )

شيكو أو محمد نبيل من أوفي ما قابلت علي وجه الارض صداقه وأخوه أكثر من عشر سنوات. شخص عنده طموح يكاد يكون يعانق السماء . أيام الجامعه كان الجميع ينظر الي النجاح والذهاب الي ماهو بعد ذلك الا هو . كان ينظر ماذا سيفعل بعد التخرج ويتحدث معك وتجد أمامك الأمل متجسد في هيئه رجل

بعد التخرج وجد أمامه كل الابواب مغلقه فقرر قرار السفر الي الخارج ولم يعلم به أحد الا وهو يحدثني يومأ علي الموبيل أنا علي حدود ليبيا يا شقيق عايز مني حاجه ؟ وسافر وعاد وأخذ يفكر في العمل هنا الي أن جاءته فرصه عمل أخري في دوله الإمارات ونفس الحال هو هو. ولكن نبرته قد تغيرت وكان تعليقه علي موضوعي بمجرد الصدمه بالنسبه لي والحاحه عليا اني أجاوب انا علي السؤال. تعجبت من تحول حلم شيكو ومن تغير وجهه نظره . هذا الشخص الذي كان الوقود لجميع أصدقائي للمساعده علي هموم الدنيا .

الاجابه بتاعتي يا شيكو وبدون لف ودوران . أحنا مش قادرين نحلم لاننا ببساطه مش عارفين نعيش

بص في الوشوش اللي ماشيه في الشارع ؟

بص في الناس اللي رايحه اشغالهم ؟

بص للشباب اللي بينحت في الصخر ؟

مش يأس والله ولكنه فاض الكيل بينا

عارف أن الغربه صعبه ومحدش فيها بيسأل عن التاني لكن صعب أوي لما تحس أنك غريب وانت في بلدك

شيكو والله العظيم وحشتني يا صاحبي

****

بوست جديد عند العبدين

سؤال .... ؟

هو أحنا لسه قادرين نحلم .... ؟